भारतीय चलचित्र ‘बटवारा १९४७’ को नेपालमा प्रदर्शन रोकिएको छ । सेन्सर पास हुन नसकेकाले आज सो चलचित्र नेपालमा रिलिज भएन ।
नेपालका विभिन्न स्थानमा हालै मात्र हिन्दू-मुस्लिमबीच साम्प्रदायिक द्वन्द्व उत्पन्न भएको परिस्थितिमा यस्तै विषयवस्तुमा निर्मित सो चलचित्रलाई सेन्सर बोर्डले संवेदनशील रूपमा हेरेको थियो । बोर्डले चलचित्रका विवादास्पद बन्न सक्ने केही सिनहरू हटाउन वितरकलाई निर्देशन दिएको छ ।
बोर्डको लिखित निर्णयमा भनिएको छ, ‘ ‘प्रस्तुत चलचित्र जाँच गरी हेर्दा हालसालै नेपालमा घटेका घटनाक्रमलाई मध्यनजर गरी धार्मिक सहिष्णुता तथा शान्ति सुरक्षामा खलल पार्ने तथा नकारात्मक प्रभाव पार्न सक्ने सम्भावना देखिएकाले देहायका विषय संशोधन गरी १६ वर्षभन्दा माथिका उमेर समूहका दर्शकले हेर्ने गरी सार्वजनिक प्रदर्शन गर्न अनुमति दिने निर्णय गरियो ।’
बोर्डले भने यस्तो संवेदनशील समयमा साम्प्रदायिकता बढाउने खालका विदेशी चलचित्रहरू जस्ताको तस्तै प्रदर्शन अनुमति दिन नसकिने प्रष्ट पारेको छ ।
बोर्ड स्रोतले भन्यो, ‘हामीले भनेअनुसार काँटछाँट भएन भने चलचित्र प्रदर्शनमा आउँदैन ।’
राजकुमार सन्तोषी निर्देशित यस चलचित्रमा सन्नी देवलले मुख्य भूमिका निर्वाह गरेका छन् । चलचित्र भारत र पाकिस्तानको विभाजनको कथामा बनेको छ । भारत र पाकिस्तान दुवै नेपालका मित्रराष्ट्र हुन् ।
यस्ता भारतीय चलचित्रले पाकिस्तानको गलत चित्रण गर्ने र हिन्दू-मुस्लिम साम्प्रदायिकतालाई प्रोत्साहन गर्ने भएकाले नेपालमा प्रदर्शन गर्न रोक लगाउनुपर्ने आवाज पहिल्यैदेखि उठ्दै आएको छ ।
